અમદાવાદ શહેર અને જિલ્લામાં ખાનગી હોસ્પિટલો સામે નિયમોનું ઉલ્લંઘન કરવા સંબંધિત અનેક ફરિયાદો સામે આવી રહી છે. તાજેતરમાં આરોગ્ય વિભાગને કુલ 24 ફરિયાદો મળતા તંત્ર સજાગ બન્યું છે. આ ફરિયાદોમાં દર્દીઓ પાસેથી નિયમો વિરુદ્ધ રીતે રૂપિયા વસૂલવાના ગંભીર આક્ષેપો કરવામાં આવ્યા હતા. ફરિયાદોની પ્રાથમિક તપાસ બાદ આરોગ્ય વિભાગે સંબંધિત 24 ખાનગી હોસ્પિટલોને નોટિસ પાઠવી છે.
આરોગ્ય વિભાગે ગંભીરતાથી તપાસ હાથ ધરી
માહિતી અનુસાર કેટલાક દર્દીઓ પાસે પીએમજેવાય (PMJAY) કાર્ડ હોવા છતાં હોસ્પિટલો દ્વારા સારવાર બદલ પૈસા લેવામાં આવ્યા હતા. નિયમો મુજબ આ યોજના હેઠળ લાભાર્થીઓને મફત અથવા સહાયિત સારવાર મળવી જોઈએ. તેમ છતાં કેટલીક હોસ્પિટલોએ આ નિયમોની અવગણના કરીને દર્દીઓ પાસેથી નાણાં વસૂલ્યા હોવાના મામલા સામે આવ્યા છે.આ મુદ્દે આરોગ્ય વિભાગે ગંભીરતાથી તપાસ હાથ ધરી હતી. તપાસ દરમિયાન કેટલીક હોસ્પિટલોમાં ગેરરીતિઓ અને નિયમોનો ભંગ થયો હોવાનું સામે આવતાં તંત્રએ તરત જ કાર્યવાહી કરી છે. સંબંધિત હોસ્પિટલોને કારણ દર્શાવતી નોટિસ આપવામાં આવી છે અને નિયમોનું પાલન કરવાની ચેતવણી પણ આપવામાં આવી છે.
36.84 લાખનો દંડ વસૂલવામાં આવ્યો
અધિકારીઓના જણાવ્યા મુજબ આ મામલે અત્યાર સુધીમાં કુલ રૂ. 36.84 લાખનો દંડ વસૂલવામાં આવ્યો છે. તંત્ર દ્વારા ભવિષ્યમાં આવી ગેરરીતિઓ ફરી ન બને તે માટે પણ કડક દેખરેખ રાખવામાં આવી રહી છે.ઉલ્લેખનીય છે કે અગાઉ પણ અમદાવાદમાં ખાનગી હોસ્પિટલ સાથે સંકળાયેલો એક મોટો વિવાદ સામે આવ્યો હતો, જેમાં પીએમજેવાય યોજનાનો દુરુપયોગ થવાનો મુદ્દો ચર્ચામાં રહ્યો હતો. આ તાજેતરની કાર્યવાહી બાદ આરોગ્ય વિભાગ હવે ખાનગી હોસ્પિટલોની કામગીરી પર વધુ કડક નજર રાખી રહ્યું છે.
