અમદાવાદ શહેરના બાપુનગર વિસ્તારમાં ટ્યુશન ક્લાસ દરમિયાન વિદ્યાર્થી પર હુમલો થયાની ઘટના સામે આવી છે. આ બનાવ બાદ વિસ્તારમાં ચકચાર મચી ગઈ છે. સમગ્ર મામલે પોલીસે તપાસ શરૂ કરી છે અને ઘટનાના તમામ પાસાઓની તપાસ કરવામાં આવી રહી છે.મળતી માહિતી મુજબ ટ્યુશન ક્લાસમાં બેસવાની જગ્યાને લઈને વિદ્યાર્થીઓ વચ્ચે બોલાચાલી થઈ હતી. એક વિદ્યાર્થીને અન્ય ક્લાસમાં બેસવા માટે કહેવામાં આવતા બંને વચ્ચે તણાવ ઊભો થયો હતો. શરૂઆતમાં થયેલી બોલાચાલી બાદ મામલો શાંત થયો હતો, પરંતુ બાદમાં આ વિવાદ ફરી ઉગ્ર બન્યો હતો.
એક વિદ્યાર્થીએ બીજા વિદ્યાર્થી પર ધારદાર હથિયારથી હુમલો કર્યો
પોલીસ તપાસ અનુસાર બોલાચાલીનો મનદુઃખ રાખીને એક વિદ્યાર્થીએ બીજા વિદ્યાર્થી પર ધારદાર હથિયારથી હુમલો કર્યો હતો. આ હુમલામાં ઘાયલ થયેલા વિદ્યાર્થીને તાત્કાલિક સારવાર માટે હોસ્પિટલ ખસેડવામાં આવ્યો હતો.ઘટનાની જાણ થતાં ગુજરાત પોલીસની ટીમ તાત્કાલિક સ્થળ પર પહોંચી હતી અને સમગ્ર ઘટનાની તપાસ હાથ ધરી છે. ટ્યુશનમાં સાથે અભ્યાસ કરતા અન્ય વિદ્યાર્થીઓની પણ પૂછપરછ કરવામાં આવી રહી છે જેથી ઘટનાક્રમ વિશે વધુ માહિતી મળી શકે.સાથે જ હુમલાખોર વિદ્યાર્થી પાસે હથિયાર ક્યાંથી આવ્યું અને આ ઘટના પાછળનું સાચું કારણ શું છે તે અંગે પણ પોલીસે તપાસ શરૂ કરી છે. પોલીસનું કહેવું છે કે તમામ વિગતો બહાર આવ્યા બાદ જરૂરી કાયદેસરની કાર્યવાહી કરવામાં આવશે.
